Leti

Kl. 8:47 fór ég í óendanlegt letikast og virðist engin leið vera út. Letikastið hefur því varað í tæpar fjórar klukkustundir og ég er ekki búin að gera neitt af viti nema borða hádegismat og skola af mér eftir æfinguna í morgun. Kannski er undirmeðvitundin að láta mig taka út letina núna, þar sem ég hef ekki tíma til að vera löt næstu vikurnar. Það er búið að setja fyrir fyrsta heimaverkefnið, þó skólinn byrji ekki fyrr en á þriðjudag, og nýja vinnan byrjar eftir nokkra daga...

Þetta er örugglega ómerkilegt blogg, en mér er alveg sama. Þegar ég er svona löt er ég sko ekki að nenna að blogga um eitthvað áhugavert hehe... 

Kvöld

Er að horfa á Extreme Home Makeover með öðru auganu á meðan ég æfi mig í kapli. Skyndilega langar mig ótrúlega mikið í heimsins feitustu kisu og kalla hana Peanut. Mér finnst það algjör snilld...

Annars er mest lítið að frétta. Byrjaði í líkamsrækt sem gengur frá mér þrisvar í viku kl. 6:30. Er því búin að vera ein harðsperra síðustu tvær vikurnar og er núna með marbletti á stærð við Eyjaálfu á sitt hvoru hnéinu. En þetta kemur allt með kalda vatninu hjá mér og ég verð örugglega komin niðrí Hollywood stærð á no time...

Ég lét loksins undan myspace þrýstingnum og fékk mér síðu. Hún er komin hér til hliðar ef þið viljið skoða. Er samt ekki búin að fatta þetta ennþá, en það kemur vonandi með tíð og tíma... 

 

Zombie Dögg

Það eru eins og aðdáendur mínir finni sig mun knúnari til að kommenta þegar ég held mér saman í marga daga, heldur en þegar ég birti hverja færsluna á eftir annarri. Hef kosið að túlka þetta ekki í bili...

Fyrir forvitna ætla ég að ljóstra upp svarinu við síðasta bloggi. Ég er komin með ný gleraugu. Þessi umskipti voru ekki pjattrófulegs eðlis, heldur fóru gömlu gleraugun einfaldlega í sundur. Svo er ég líka 0,25 nær því að ganga í Blindrafélagið, þannig að ný gleraugu þóttu nauðsynjakaup...

Síðasta miðvikudag vaknaði ég upp með rauð augu. Það er ekki töff. Ég er ennþá með rauð augu, þrátt fyrir að hafa brúkað fyrst augndropa og svo krem í augun á mér. Ég er líka meira að segja búin að fara tvisvar til læknis á þessum tíma, buddunni minni til mikillar ánægju. Það er ekki gott að vera með krem í augunum og það er ekki gott að vera með rauð augun. Ég lít líka út eins og félagi í living dead klúbbinum eða eins og ég sé ávallt nýkomin af hörkudjammi. Kannski þess vegna sem ég fékk svona look frá píunni sem afgreiddi mig um kippu af bjór í ríkinu á föstudaginn...

Hef annars voða takmarkað að segja í bili, hef ekki haft tíma til að ráða lífsgátuna sökum anna síðustu vikur, bæði í vinnu og svo við lestur á Harry Potter. Lofaði Ingó í fyrra að lesa um þennan galdrastrák sem er ekki svo vitlaus eftir allt saman. Þar sem ég las bara eina bók í fyrra þá þurfti ég að spýta í lófana í ár og er núna búin með fjórðung af bók fjögur, sem er um Harry Potter and the Goblet of Fire...

Nú eru bara sextán dagar þangað til ég hætti í vinnunni og tek mér viku frí fyrir skólann. Inn í þessu eru 2 helgar sem er bara snilld, þar sem ég er orðin ansi lúin. Svo er það skólinn 20. ágúst og nýja vinnan 1. september. Vei vei... 

Tilraun

Ég er með félagslega tilraun í gangi. Sú tilraun hófst á miðvikudagskvöld og stendur enn yfir. Hingað til hefur enginn sagt neitt og tekið eftir neinu. Hvað ætli líði langur tími þangað til einhver tekur eftir því? Eða gerist það aldrei?

P.s. það þýðir ekki að spyrja hér hvað það er og nei, þetta tengist ekki barneignum þið sem eru með takmarkað ímyndunarafl...

Mánudagur

Það er einhver bloggleti í mér þessa dagana. Margt skemmtilegt búið að gerast en nenni ekki endilega að skrifa heila ritgerð um það hér. Fékk bækurnar mínar loksins heim og er byrjuð að lesa þá fyrstu.

Fór í afródanstíma með Helgu á laugardaginn og var eins mikill kripplingur og hægt er af harðsperrum í gær. Það er svona að lofa of mikla uppskeru í einu, maður tekur á vöðvum í bakinu sem maður veit varla af í daglegum hreyfingum...
Sullaði svo í bjór á laugardagskvöldið til heiðurs Laugu litlu sem hélt upp á afmælið sitt. Dugaði þó stutt og fór heim rétt eftir miðnætti. Er ekkert voðalega hrifin af bænum og finnst því betra að fara bara heim eftir partý, enda er það einnig mun hagkvæmara fyrir budduna...

Lag í tilefni mánudags, over and out í bili...

 

Nörd

Hér má sjá kunnulegt nafn, nafnið á sætasta nörd sem ég þekki, enda var ekki við öðru að búast þessa önnina hjá honum... 

Frekara blogg bíður betri tíma, þar sem öll orka mín í dag er búin að fara í leiðindaveikindi, varð bara að koma montinu að...

Jamm

 

 

 

 

 

 

 

Ég er að spá á hvaða máli mbl menn telja, þar sem ég kem þessari tölu nú ekki fyrir mig. Kannski ekki skrýtið þar sem ég er ekki mikil málamanneskja...

Annars finnst mér þetta ótrúlega fyndið...

Mánudagur

Í dag er ég alveg handviss um að það sé mánudagur. Allavegana er meiri mánudagur í dag heldur en var í gær. Það er vont veður, ég er illa sofin og ég komst ekki inn á námskeiðið sem ég skráði mig á. Gleðifréttir dagsins eru þó að 4 bækur af 5 eru lagðar af stað...

Pakki...

Mér finnst gaman að bíða eftir pakka, þó svo að ég borgi fyrir hann sjálf. Verst hvað það tekur langan tíma að fá pakka frá útlöndum...

Langimangisvangamangason

Mig er búið að langa í vöfflur með rjóma og kakó í allan dag. Það er ekki eðlilegt að langa í svona jumm heilu dagana, sérstaklega þar sem ég borða nú yfirleitt vöfflur með sykri, bara svona ef ykkur langaði að vita það líka. En ég má líka alveg skrifa um ómerkilega hluti inn á bloggið mitt...